Si Palui

Kisah Cendol Anak Palui

Lawas kada bu lik matan madam, makanya imbah bulik ka pahuluan Palui pasti mancari makanan nang dahulu rancak dimakannya wayah masih badiam di kampung.

Siang itu Palui wan anak singgah di warung Pakacil Isul. Rupanya imbah matan bajalanan ka pasar lalu inya badua kahausan. Wayah mamasan banyu, datang Garbus wan Tulamak mamaraki. “Aku dandaman banar wan makanan wan minuman banua kita ini Bus ai,” ujar Palui sambil manjumput wadai lamang.

“Maksud ikam makanan atawa nginuman banua itu, kaya bingka, lamang, pupudak alias susunduk lawang, cincin, lupis, apam batil, cingkaruk, papare, balungan hayam, tamasuk jua kalalepon,” ujar Garbus manyambati.

“Bujur Bus ai, tapi nang ikam sambati itu hanyalah ngaran wadai-wadainya haja, balum lagi ngaran makanan wan nginumannya. Cuntuhnya antara lain adalah nasi kabuli, katupat kandangan, nasi pundut, lapat,” ujar Palui.

“Ada lagi nang balum ikam sambat Lui ai,” ujar Tulamak umpat manyahut.

“Napa Mak yang balum kami sambat,” ujar Garbus.

“Itu ngaran nginuman nang dinginum ulih anak Palui,” ujar Tulamak manunjuk anak Palui pahalusnya nang duduk diasuhannya.

“Nginuman ini ngarannya dawet,” sahut Palui.

“Dawet itu bahasa Jawa Lui ai, kalu bahasa kita di sini ngarannya cendol basantan bagula dan nang istimewanya gulanya adalah gula habang,” ujar Tulamak.

“Cendol itu ada dua macam Lui ai, yaitu cendol baras wan cendol sagu,” ujar Garbus.

“Aku paham haja dan samunyaan sudah jua tarasani. Hanya anakku ini nang hanyar tahu nginuman cendol, makanya inya katuju banar,” ujar Palui.

“Aku tadi mulanya handak jua nginum cendol tapi tapaksa kada jadi karna malihat anak Palui,” ujar Tulamak mambisiki Garbus.

“Napa kaitannya antara cendol wan anak Palui itu Mak?” ujar Garbus hiran.

“Cuba itihi bagamat, itu hingus anak Palui nang parsis kaya cendol baras balilihan masuk ka cangkirnya,” ujar Tulamak manyirit sambil bakirik galianan.

“Hiih, aku katuju banar jua cendol baras ini, aku wan anakku parak habis dua cangkir. Apalagi nang dinginum anakku ini rasanya manis-manis masin,” ujar Palui pina kanyamanan banar.

“Pantas haja rasanya manis-manis masin karna tacampur hingus anaknya,” ujar Garbus taumpat manjalujuk handak muak.

“Kanapa maka handak muak Bus, ikam urang banua kada mambiasakan nginum dawet alias cendol ini. Mustinya kitalah nang mahidupakan usaha bubuhan warga kita jua,” ujar Palui banasihat.

“Hiih, kami paham haja tapi lain itu alasannya Lui ai,” ujar Garbus wan Tulamak kada handak mangisahakan alasan nang sabujurnya.